28.08.05 - Sporttag Oberrüti
Nome Usesiiterchance hend mer eus au da Johr am Sporttag usgrächnet. S'Ziel esch wie emmer gseh 1 Match z'gwönne.
Im erschte Match gäge de Iväänu ond sini Räbebuure send mer nie richtig is Schpiel cho ond händ 0:2 verlore. Besser esch es denn gäge d'Hobacker-Kickers gloffe, nochere tadellose Abwehrleistig esch es 0:0 usgange.
Im 3. Match esch de Titelverteidiger d'Noteheuer euse Gägner gseh. S'Schpiel esch erscht es paar Sekunde alt gseh, do het de Rälfu eus i Füehrig gschosse. De Vorschprung hend mer ned lang chönne hebe, glii esch es 1:2 gschtande. I de Schlussminute hed denn de Schiri, nochemene Rempler vom Nede a sim Gägespieler, of de Penaltypunkt zeigt. D'Noteheuer händ met em 1:3 de Match entschiede.
Im letschte Match esch es denn gäge Z-Fighters gange. Au i dem Match send mer Usesiiter gseh. Doch ganz öberraschend hed euse Knipser weder zuegschlage: 1:0 durch de Rälfu. Denn hend mer hinde gmuuret ond of Konter gluuret. Während die Einte 100% Torchance vergäh händ (Nede), Anderi schier es Eigegoal produziert händ (Jauk) hed de Chäppi im Goal eus met mirakulöse Parade im Schpiel bhalte. So esch es au noch 8 Minute immer no 1:0 gschtande – mer händ euses Tagesziel erreicht!
Förs Halbfinal heds notürli ned glänget, aber d'Vorrundi hed au eso gnueg Dorscht gäh! |
